#MakeMyTrip...

MakeMyTrip :-

MakeMyTrip हे अॅप आजकाल सर्वांच्या मोबाईलमध्ये असते. हवाईसेवा, बस, ट्रेन किंवा देशातील तसेच परदेशातील हॉलिडे हॉटेल्स बूक करायचे असल्यास आपण MakeMyTrip या कंपनीची सेवा पसंत करतो. फिरायचं असेल किंवा कार्यालयीन कामानिमित्त बाहेर राज्यात जाणे असो, या कंपनीची सेवा आपल्यासाठी हमखास तयार असतेच. कंपनीने उत्तम सुविधेमुळे ग्राहकांचा विश्वास संपादन केला आहे. आता घेऊया या कंपनीच्या कार्याचा आढावा.

साधारण २००० साली दीप कालरा यांनी MakeMyTrip ही स्टार्टअप कंपनी सुरू केली. तेव्हाचा काळ म्हणजे नामी बिझनेसमनचा. त्यात स्टार्टअप ही संकल्पना फारच नवीन होती. परंतु दीप यांना आपल्या कल्पनेवर परिपूर्ण विश्वास होता. पुढे जाण्यापूर्वी त्यांच्या संघर्षाबद्दल जाणून घेऊयात. दीप यांनी दिल्लीच्या सेंट स्टीफन कॉलेजमधून अर्थशास्त्र विषयाचे पदवीधर झाले. पुढे एमबीएची डिग्रीसाठी त्यांनी आयआयएम-अहमदाबाद येथून पूर्ण केली.

त्यावेळचा काळ म्हणजे एमबीएसाठी महत्त्वपूर्ण काळ होता. अनेक मोठ-मोठ्या कंपन्या एमबीए झालेल्या विद्यार्थ्यांना मोठी पोस्ट आणि गलेलठ्ठ पगाराची नोकरी देत होते. अशातच दीप कालरा हे एबीएन ऍम्रो बॅंकेमध्ये नोकरीसाठी रुजू झाले. परंतु पुढच्या काही वर्षात त्यांना ही नोकरी कंटाळवाणी वाटू लागली. त्यांनी नोकरीचा राजीनामा दिला आणि पुढचा एक वर्ष आपण भविष्यात काय करायचे यावर केंद्रित केला.

दरम्यान, याच काळात दीप यांना समजले की, ”जीवनात पैसाच सर्व काही नाही, आपण जे काम करीत आहोत त्यात आपल्याला रस नसेल तर ते काम व्यर्थ आहे!” आणि हीच जाणीव घेत ते जीवनातील प्रवास करीत राहिले. याच वेळी त्यांनी काही कंपन्यात काम केले पण त्यातही अपयश पदरी पडले. पुढे दीप यांनी जीई कॅपिटलमध्ये बिझनेस डेव्हलपमेंट म्हणून काम सुरु केले. या वेळेस त्यांचा संपर्क इ-कॉमर्समधील महत्त्वाचा लोकांशी झाला. त्यातूनच MakeMyTrip ची संकल्पना उदयास आली आणि दीप कालरा हे ऑनलाईन ट्रॅव्हल कंपनीचे संस्थापकीय अध्यक्ष झाले.

MakeMyTrip ही कंपनी काही वर्षात भारतातील महत्त्वाची प्रवासी वेबसाईट म्हणून प्रसिद्ध झाली आहे. कंपनी 50 शहरात 65 रिटेल्स स्टोअर्स सांभाळत आहे तसेच कंपनीची ऑफिसेस न्यु यॉर्क आणि सिडनी या महत्त्वाच्या शहरात आहेत. महात्त्वाचे म्हणजे 2010 साली कंपनीचे शेअर्स नॅसडॅक या अमेरिकेतील शेअर मार्केटमध्ये लिस्ट झाले आहेत. अशा कंपनीचा मार्केट रेव्हेन्यू 255.37 मिलीयन डॉलर आहे असून कंपनीत दोन हजारांहून अधिक लोकं काम करतात. तसेच या स्टार्टअपला अनेक पुरस्कार मिळाले आहेत.

MakeMyTrip चे फाऊंडर दीप कालरा यांनी एकदा सांगितले होते, “तुमचा बिझनेस छोटा असो वा मोठा त्याला उत्तम बिझनेस बनवा, त्याचा कारभार स्वच्छ ठेवा, त्याला असा बिझनेस बनवा ज्याचा तुम्हाला गर्व होईल.” आपलाही बिझनेस वाढविताना दीप कालरा यांचा कानमंत्र लक्षात ठेऊया आणि पुढे वाटचाल करुया…