#उद्योग आणि मराठी माणूस.._४३. भावा तुझी कधी सटकणार…?_

*उद्योग आणि मराठी माणूस...*
--------------------------------
*_४३. भावा तुझी कधी सटकणार…?_*
--------------------------------
तुम्हाला शिक्षण, व्यापार किंवा आयुष्यात यश मिळत नाही. गरिबीतून बाहेर पडता येत नाही, बेकारी तोडता येत नाही, बहिणीच्या लग्नाला पैसे नाहीत. वडिलांच्या डोक्यावर कर्ज आहे, राहायला घर नाही, घरचे राहणीमान चांगले नाही; अशावेळी माझ्या मराठी तरुण भावांना राग आला पाहिजे, तुमचे डोके सटकले पाहिजे. जगात बाकीचे श्रीमंत मग आपणच गरीब का? याचा राग यायला हवा व डोके सटकून वेगाने कामाला लागले पाहिजे. तुम्हा लोकांना गरीब, कमकुवत, नापास समजून नाकारले असेल, तर यशस्वी होण्याची जिद्द तुमच्यात निर्माण झाली पाहिजे.

चेतन भगत यांना १० वी मध्ये ७५% गुण मिळाले, तेव्हा त्यांच्या एका नातेवाइकाने त्यांना 'हीच का तुझी औकात' म्हणून हिणवले. पुढे चेतन भगत यांनी खूप अभ्यास केला व आयआयटी प्रवेश परीक्षा पास झाले व सर्वांना आश्चर्यांचा धक्का दिला. पुढे अनेक कादंबऱ्या, चित्रपट लिहिले. तुमच्यात असामान्य कर्तृत्व तेव्हाच निर्माण होईल. जेव्हा तुम्हाला प्रचंड राग येईल. गरिबीचा अपयशाचा, अपमानाचा, तुमचा तुमच्या भाऊकी, भाऊबंद, सरकार इत्यादींनी केलेला अपमान व अन्याय ही तुमची मोठी ऊर्जा असू शकते, जी तुम्हाला प्रचंड यश मिळवून देऊ शकते. हे तेव्हाच शक्य आहे जेव्हा तुमची सटकेल. स्व. जयललितांना विरोधी पक्षातील नेत्यांनी सभागृहात हल्ला करून जखमी केले होते. तेव्हा त्यांनी मुख्यमंत्री पदाची शपथ घेऊनच सभागृहात परत येईन अशी शपथ घेतली व पुढील निवडणुकीत त्या विजयी होऊन मुख्यमंत्री म्हणून परतल्या. त्यांच्या रागामुळे त्या आमदार ते मुख्यमंत्री झाल्या.

ज्यांनी तुमचा अपमान, अत्याचार,अन्याय केला अशा दुश्मनांशी भांडण काढणे हा खरा बदला नसून, तुम्ही प्रचंड यशस्वी, श्रीमंत होऊन तुमच्या दुश्मनाचे डोळे दिपतील व तुमची समाजातील वाहवा होऊन दुश्मनाचा जळफळाट होईल, हाच खरा बदला होय. तुम्ही प्रचंड यशस्वी होणे हाच तुमच्या दुश्मनाचा घेतलेला खरा बदला होय. उद्योग करा, श्रीमंत व्हा, तुमचे दुश्मन तुमचे यश बघून जळून जातील.

आमच्या लेखांसंबंधी अधिक माहिती, सूचना, संदर्भ किंवा मते कमेंट बॉक्समध्ये व्यक्त करा. महाराष्ट्रात प्रत्येक घरात उद्योग उभा राहावा यासाठी आम्ही काम करतोय, तुम्ही हा लेख आपल्या मित्र व परिचितांना पाठवा. 

- प्रा. प्रकाश भोसले, सीईओ ई-ब्रँडिंग इंडिया, प्रेरणादायी वक्ते