#ईझ ऑफ डुइंग बिझनेसमध्ये भारत १००व्या स्थानावरून ७७व्या स्थानावर*..

*ईझ ऑफ डुइंग बिझनेसमध्ये भारत १००व्या स्थानावरून ७७व्या स्थानावर*
-------------------------------------
आर्थिक धोरणांवरून विरोधकांच्या टीकेशी सामना करणाऱ्या मोदी सरकारला मोठा दिलासा मिळाला आहे. जागतिक बँकेकडून दर वर्षी जाहीर करण्यात येणाऱ्या व्यवसाय सुलभतेच्या (ईझ ऑफ डुइंग बिझनेस) सूचीमध्ये भारताने १००व्या स्थानावरून ७७व्या स्थानावर झेप घेतली आहे.

जागतिक बँकेने नुकताच हा अहवाल प्रसिद्ध केला. या सूचीत गेल्या वर्षी १००व्या स्थानी असणाऱ्या भारताने यंदा २३ स्थानांची झेप घेऊन ७७वे स्थान पटकावले. व्यवसाय सुरू करणे व तो चालवणे यासंबंधी १०पैकी सहा निकषांत भारताची कामगिरी सुधारली असल्याचे जागतिक बँकेने म्हटले आहे. व्यवसाय सुरू करण्यातील सुलभता, आवश्यक परवाने मिळणे, वीजपुरवठा, अर्थसाह्य, कररचना, निर्यातीची संधी, दिवाळखोरीच्या प्रकरणांचा निपटारा करणे आदी आघाड्यांवर भारताची कामगिरी गेल्या वर्षीच्या तुलनेत आणखी चांगली ठरली आहे.

>> उपाययोजनांची दखल

मोदी सरकारने घेतलेल्या आर्थिक निर्णयांची या अहवालात दखल घेण्यात आले. अनेक प्रकारचे अप्रत्यक्ष कर रद्द करून पूर्ण देशासाठी लागू करण्यात आलेला जीएसटी या एकमेव करामुळे तसेच, बुडीत कर्जांच्या प्रमाणात २८ टक्क्यांपर्यंत घट झाल्याने भारतातील अर्थव्यवस्था सुधारली आहे, असे यात म्हटले आहे.

>> चार वर्षांतील प्रगती

केंद्रामध्ये सत्तांतर झाले तेव्हा म्हणजे २०१४मध्ये १९० देशांच्या या सूचीत भारताचा १४२वा क्रमांक होता. दोन वर्षांपूर्वी भारताने १३१व्या क्रमांकावर मजल मारली व गेल्या वर्षी शंभरावे स्थान मिळवले होते. गेल्या वर्षभरातील कामगिरीमुळे भारताने आणखी प्रगती साधत ८०च्या आतील क्रमांक हस्तगत केला आहे.

>> न्यूझीलंड अव्वल

व्यवसाय सुलभतेच्या या सूचीत न्यूझीलंडने अव्वल स्थान पटकावले आहे. यानंतर सिंगापूर, डेन्मार्क, हाँगकाँग यांचा क्रमांक लागला. यात अमेरिका आठव्या स्थानी आहे. तर, दुसऱ्या क्रमांकाची आर्थिक महासत्ता असणारे चीन ४६व्या क्रमांकावर आहे. पाकिस्तानची कामगिरी खराब असून त्यांची १३६व्या क्रमांकापर्यंत घसरण झाली आहे.