*उद्योग आणि मराठी माणूस...*
--------------------------------
_३५. आपल्या ध्येयाची स्वत:ला सतत आठवण करून द्या_
--------------------------------
मला एके दिवशी एक फोन आला, “साहब मुझे मिलना है आपको, मेरे प्रॉडक्ट को एक्सपोर्ट करना है। आप मेरे कारखाने पे आ सकते है क्या।” मी त्याच्या कारखान्यात गेलो, मुंबईतील झोपडपट्टी भागात, दोन खोल्यात त्याचा कारखाना, एक मोडका टेबल, खुर्ची, चार पाच महिला बॉक्स चिकटवणे, पॅकेजिंगचे काम करत होत्या. तो तरुण मूळचा राजस्थानचा. तिकडे तो अशा पध्दतीच्या कारखान्यात काम करायचा. तो तीन-चार वर्षापूर्वी मुंबईत आला व हा ड्रायफ्रूटसाठी लागणार डेकोरेटीव्ह पॅकेजिंग बॉक्स निर्मितीचा व्यवसाय सुरू केला. जशी आपल्याकडे दिवाळीला एकमेकांना फराळ देण्याची पध्दत आहे, तशीच उच्चभ्रू समाजात सण, समारंभ इत्यादीसाठी ड्रायफ्रूट बॉक्स देण्याची पद्धत आहे. तळलेले पदार्थ, गोड व बेकरीचे पदार्थ वगैरे आता प्रमाण कमी झाले. आता ड्रायफ्रुटला खूप मोठी मागणी आली आहे. अनेक उच्चभ्रू लोकांच्या विवाहात प्रत्येक लग्नाच्या पत्रिकेबरोबर ड्रायफ्रुटचा बॉक्स दिला जातो. टॉप कॉर्पोरेट क्षेत्रात ही पध्दती आहे. अशा गिफ्ट बॉक्सेस तयार करण्याचा व्यवसाय फारसा आपणास दिसत नाही, पण तोही मोठा आहे. अशा एका बॉक्सची किंमत १२० रु. पासून ९०० रुपयापर्यंत आहे. असे बॉक्सेस निर्यातही मोठ्या प्रमाणावर होतात. ह्याची निर्मिती पुठ्ठे, थर्माकोल, पेपर, चमकी, कागद इत्यादी आकर्षक बाबीपासून केली जाते. ही एक प्रकारची पेपर क्राफ्ट कला आहे.
त्या तरुणाने मला खुर्चीवर बसण्याची विनंती केली. मी बसलो व थोडासा टेकलो, तर मला पाठीला खिळा टोचला. मी म्हणालो, "अरे इस कुर्सी में कील है, इसको ठीक करना पडेगा।" त्यावर त्याने जे उत्तर दिले ते थक्क करणारे होते. तो म्हणाला, "साहब ये कील मैने ही लगवाया है। मैं गावसे कुछ कमाने के लिए मुंबई आया, उस चीज की तो मुझे हर वक्त याद रहनी चाहिए| जब मैं इस कुर्सी पर बैठता हूँ, तब कील चुभती है और मुझे बताती है, जब तक तू कमायेगा नहीं, तब तक बैठ नहीं सकता| मैं आया हूँ, की पाच साल में कम-से-कम एक करोड का बिझनेस करूंगा, तब तक चैनसे नही बैठूंगा| ये कील इसीलिए लगाया है, की मुझे आरामसे बैठने की आदत न लगे|"
पुढे त्याच्या एक्सपोर्ट करण्यासंबधीच्या चर्चा सुरू झाल्या व नंतर मी तेथून बाहेर पडलो. ज्याला आपले ध्येय गाठायचे आहे, त्याने आपल्या ध्येयाची आठवण प्रत्येक दिवशी व्हावी अशी काहीतरी गोष्ट करावी, जसे त्या तरुणाने खुर्चीला खिळा लावला होता.
आमच्या लेखांसंबंधी अधिक माहिती, सूचना, संदर्भ किंवा मते कमेंट बॉक्समध्ये व्यक्त करा. त्या अनुषंगाने पुढील लेखात माहिती देण्याचा आमचा प्रयत्न असेल. महाराष्ट्रात प्रत्येक घरात उद्योग उभा राहावा यासाठी आम्ही काम करतोय, तुम्ही खारीचा वाटा उचला, हा लेख आपल्या मित्र व परिचितांना पाठवा.
- प्रा. प्रकाश भोसले, सीईओ ई-ब्रँडिंग इंडिया, प्रेरणादायी वक्ते
Comments
Post a Comment