#कर्जाचे प्रॅक्टिकल तंत्र-मंत्र....

कर्जाचे प्रॅक्टिकल तंत्र-मंत्र समजून घ्या
--------------------------------
मला सर्वाधिक विचारला जाणारा प्रश्न म्हणजे आम्हालाही उद्योग करायचा आहे, पण भांडवल नाही. मित्रहो भारतात सुमारे १ कोटीहून अधिक नोंदणीकृत उद्योग आहेत. त्यातील किमान ५०% हून अधिक व्यवसायिकांनी कर्ज घेतलेले असते व ते सतत घेतात व बँकाही त्यांना देतात. भांडवल मिळवण्याचे तंत्र समजण्यासाठी तुम्हाला मी एक साधं उदाहरण देतो. लहान मुले पतंग उडवतात. काहीच वारा नसेल, तर पतंग उडत नाही, थोडासा वारा आला, की एक मुलगा पतंग हातात धरतो व तो हवेत उडवतो व दूसरा मुलगा पतंगाची दोरी हातात घेऊन खेचतो व ढील देतो व हळूहळू पतंग वरती जाऊ लागतो. पतंग जसजसा वरती जाऊ लागतो, तसा त्याला वरच्या पट्टीतला वारा मिळतो व पतंग अजून वरती जातो व जातच राहतो. अधूनमधून त्याला ढील देतदेत दोरी सोडत राहायची असते. सुरुवातीला काही फूट न उडणारा पतंग आता काही किलोमीटर वर उडत असतो.

मित्रहो तुमच्या लक्षात आले असेल; कोणतीही बँक, फायनान्स कंपनी फक्त तुम्ही उद्योग सुरू करणार आहात, केवळ ह्या म्हणण्यावर व तुमचे तोंड पाहून कर्ज देत नाही. प्रथम ऑनपेपर, प्रत्यक्ष काही आहे का, काही सुरू केले आहे का, ते पाहिले जाते. बिझनेसचा फिजिबीलीटी रिपोर्ट आहे का, कंपनी स्थापन करून करंट अकाऊंट काढले आहे का? काही महिने खात्यावर उलाढाल आहे का? तुम्ही स्वत:ची काय गुंतवणूक केली आहे का? फायद्याचे प्रमाण किती आहे? इत्यादी अनेक गोष्टी तुम्हाला सुरुवातीला दाखवाव्या लागतात.

एक लक्षात ठेवा चालत्या गाडीत लोक बसतात, बंद गाडीत किंवा गाडी चालू होणार आहे अशा गाडीत कोणी बसत नाही. मला मोठी नोकरी लागणार आहे, मला मुलगी द्या म्हणून तुम्ही कधी स्थळ बघायला जाल का? नाही ना? लोक वेड्यात काढतील ना? तसेच कशाचा कशाला पत्ता नाही आणि झोपेतून उठला आणि बँकेत गेला व मॅनेजरला म्हणतो की मला उद्योग करायचा आहे, मला २० लाख कर्ज द्या. मॅनेजर हसतो व बाहेरचा रस्ता दाखवितो. बँकेला २० लाख मागण्याअगोदर घरच्यांना, मित्रांना २५ हजार मागून बघा, देतात का? स्वतःची पत निर्माण करण्याची सुरुवात घरापासून करा. मित्र, घरचे तुम्हाला तेवढेही देत नसतील, तर तुमची खरी पत तुम्ही समजा. स्वप्नाच्या दुनीयेतून वास्तवात या. व्हॉटसअपवर २०० मित्र, पण २५ हजार कोणी देत नाही. घरचे लोक, मित्र विश्वास ठेवत नाहीत, मग बँक का ठेवेल. आपली आर्थिक पत तयार करण्याचे तंत्र मराठी माणसाने शिकणे काळाची गरज आहे. ज्याची आर्थिक पत आहे, आज त्यालाच फक्त किंमत आहे, बाकीचे रोजंदारीवर झेंडे घेऊन फिरायला…

- प्रा. प्रकाश भोसले