#रोल्स रॉईसमधून फिरणारा केशकर्तनकार...

*रोल्स रॉईसमधून फिरणारा केशकर्तनकार*
------------------------
सकाळची वेळ. ऐटीत तुम्ही बाईकवर स्वार होता. बाईक सलून समोर ऐटीत उभी करता. केस कापून झाल्यानंतर त्या केशकर्तनाकाराकडे हलकासा कटाक्ष टाकत त्याच्या समोर १०० रुपयाची नोट देता. स्वत:च्याच धुंदीत स्वत:ला आरशात न्याहाळत त्याने दिलेले उरलेले पैसे खिशात टाकता आणि बाईकवर स्वार होऊन ऐटीत घरी येण्यासाठी निघता. सलून समोरुन बाईक काढताना तुम्हांला तो मघासचा केशकर्तनकार जर रोल्स रॉईसमधून बाहेर पडताना दिसला तर तुमची अवस्था काय असेल? निव्वळ वाचून गांगरलात ना... पण अशी अवस्था बंगळुरु मधल्या अनेक तरुणांची होते. जेव्हा ते रमेश बाबूला पाहतात. ६५ रु केशकर्तनाचे घेणाऱ्या आणि ३ कोटी रुपयांच्या रोल्स रॉईसमधून फिरणाऱ्या रमेश बाबूची कथा कोणत्याही साऊथ इंडियन फिल्म मध्ये शोभावी अशीच आहे. किंबहुना आजचा लेख वाचताना काही वेळेसाठी सुपरस्टार रजनीकांतच्या एखाद्या चित्रपटाची कथा वाचतोय की काय असेच तुम्हांला वाटेल.

रमेश ७ वर्षांचा असतानाच त्याचे बाबा पी. गोपाळ यांचं निधन झालं. व्यवसायाने नाभिक असलेल्या गोपाळ यांनी आपल्या कुटुंबियांसाठी एक छोटंस केशकर्तनाचं दुकान मागे ठेवलं होतं. रमेशची आई चार घरची धुणीभांडी करत आपल्या मुलांना वाढवू लागली. केशकर्तानचं दुकान तिने भाड्याने दिलं. महिना पाच रुपये भाड्याचे मिळत. मात्र मुलांच्या शिक्षणाची आणि पोटापाण्याचा ताळमेळ साधताना या माऊलीला फारच खस्ता खाव्या लागत होत्या. निव्वळ एका वेळच्या जेवणावर रमेशची भावंडं आणि त्याची आई गुजराण करु लागली. एक तर शिक्षण करावं किंवा काम करुन घराला हातभार लावावा असे दोनच पर्याय रमेश पुढे होते. कसंबसं दहावीपर्यंत शिक्षण पूर्ण करुन रमेशने इलेक्ट्रॉनिक्स विषयात पदविका मिळविली. दुकानाचं भाडं अत्यल्प होतं. १९८९ मध्ये हे दुकान स्वत:च चालविण्याचा निर्णय रमेशने घेतला.

हळूहळू दुकानाचा चांगलाच जम बसला. रमेशच्या दुकानाची ‘इनर स्पेस’ची ख्याती वाढली. आता रमेश काही पैसा गाठिशी बांधू लागला. त्याच्या घरच्या गरजा पूर्ण होऊ लागल्या. १९९४च्या दरम्यान जमविलेल्या पैशातून त्याने मारुती ओम्नी खरेदी केली. वैयक्तिक वापरासाठी त्याने गाडी खरेदी केली होती पण दिवसभर ती तशीच उभी असायची. रमेशने गाडी भाड्याने देण्यास सुरुवात केली. इथेच खऱ्या अर्थाने रमेश बाबूच्या नवीन उद्योगाची बीजे रोवली गेली आणि रमेश टूर्स एण्ड ट्रॅव्हल्सचा उदय झाला. १९९४ ते २००४च्या दरम्यान त्याने सात गाड्या विकत घेतल्या. गाड्यांचे चालक उत्तम वर्तणूकीचे असले पाहिजेत याकडे रमेशचा कटाक्ष असे. कारण जर चालक उत्तम असेल तर ग्राहक समाधानी असत, हे गमक त्याला उमगलं होतं.

रमेशने एक स्वत:चं छोटंसं ऑफिस घेतलं. आता अलिशान वाहनाच्या वर्गात आपण पाऊल ठेवावं असं त्याला वाटू लागलं. या उद्देशाने त्याने थेट ४२ लाख रुपयांची मर्सिडिज बेन्झ घेतली. त्यासाठी त्याने बॅंकेकडून कर्ज घेतलं. इतर कंपन्या अलिशान गाड्या ग्राहकांना पुरवित मात्र त्या गाड्या जुन्या असत. रमेश मात्र नवीन गाड्या ग्राहकांना देई. परिणामी ग्राहकांचा ओघ रमेशकडे वाढला. आज रमेशबाबूंकडे २०० विविध प्रकारच्या गाड्या आहेत. यामध्ये मिनी बसेस, व्हॅन व्यतिरिक्त रोल्स रॉईस सिल्व्हर घोस्ट, सी, ई आणि एस क्लासच्या मर्सिडीज, ५, ६ आणि ७ या शृंखलेतील बीएमडब्ल्यू गाड्या आहेत. रमेशकडे इम्पोर्टेड मर्सिडीज व्हॅन्स, टोयोटा मिनी बसेस, टोयोटा इन्होव्हाजचा ताफा आहे. रमेशकडे सगळ्यात कमी भाडं हे प्रतिदिन १५०० रु गाडी पासून ते अगदी ७५ हजार पर्यंत देखील आहे. ७५ हजार रुपये हे रोल्स रॉईसचं एका दिवसाचं भाडं आहे. या शुल्कांवरुन आपणांस रमेशबाबूच्या मिळकतीचा अंदाज आलाच असेल. रमेशची स्वत:ची १६ लाख रुपये किंमतीची सुझुकी बाईक आहे. आजमितीस त्याच्याकडे ६० हून अधिक वाहनचालक कार्यरत आहेत. पण जर कोणाला भाड्याने गाडी घेऊन स्वत:ला वाहन चालवायचे असेल तरी देखील ती सुविधा आहे. अनेक मोठे राजकारणी, व्यावसायिक, लष्करी अधिकारी त्याचे ग्राहक आहेत. सलमान खान, आमिर खान, ऐश्वर्या राय-बच्चन यांसारख्या फिल्मस्टार्सना देखील तो गाड्या पुरवितो.

एवढा मोठा व्यवसायाचा पसारा असून देखील आजपण रमेश आपल्या इनर स्पेस सलून मध्ये केशकर्तनाचे काम करतो. सकाळी १० ते ४ गाड्यांचा व्यवसाय ४ ते ७ सलून पुन्हा ७ ते ८.३० गाड्यांचा व्यवसाय असा त्याचा दिनक्रम आहे. रविवार मात्र पूर्ण दिवस तो सलून मध्ये काम करतो. पुरुषांच्या केशकर्तनाचे ६५ रुपये तर स्त्रियांच्या केशकर्तनाचे १५० रुपये तो आकारतो. केशकर्तनाच्या व्यवसायामुळेच रमेश अजूनही जुने दिवस विसरलेला नाही. त्याच्या या ‘डाऊन टू अर्थ’ स्वभावामुळेच खऱ्या अर्थाने तो रजनीकांत आहे.

-प्रमोद सावंत